Risasi zarindima nyumbani kwa mwanasiasa wa Kongo Kamerhe

Ni pale watu wenye silaha waliovalia sare za jeshi walipopambana na walinzi wa mwanasiasa kigogo Vital Kamerhe kwenye makaazi yake yaliko karibu na Ikulu ya nchi hiyo.

Duru kutoka nchini humo zinasema watu watatu wameuwawa kwenye makabiliano hayo. Msemaji wa Kamerhe amearifu kwamba watu hao wenye silaha walivamia makaazi ya mbunge huyo na waziri wa uchumi lakini walidhibitiwa na walinzi wake.

Vyombo vya habari vya nchi hiyo vimewatambulisha watu hao kuwa wanajeshi wa Kongo lakini haikufahamika mara moja juu ya iwapo walikwenda kwenye makaazi ya Kamerhe kwa lengo la kumkamata.

Hivi sasa Kamerhe anawania kiti cha spika wa bunge la taifa katika uchaguzi uliopangwa kufanyika jana Jumamosi lakini uliahirishwa kutokana na mivutano ndani ya chama tawala.