Najeriya: Kotu ta saki Zazaky da matarsa

A Najeriya, kotu a Jihar Kaduna, ta wanke jagoran 'yan Shi'a Sheikh Ibrahim Zakzaky daga dukkan tuhume-tuhume takwas da ake masa. Kotun ta kuma bayar da umarnin sallamar Malamin da matarsa a hukuncin da ta yanke a wannan Laraba.

Tun dai a shekarar 2015, ake tsare da jagoran na 'yan Shi'a a Najeriya, bayan wani artabu a tsakanin magoya bayansa da jami'an tsaro, mutum kimanin 350 ne suka rasa rayukansu a sakamakon gumurzun da ya auku a birnin Zariya na jihar Kaduna tsakanin 'yan Shi'a da sojoji.

Daga bisani ma dai, gwamnatin jihar Kadunan ta haramta ayyukan Muslim brotherhood bayan da magoya bayan kungiyar suka soma gangamin neman a saki malamin.